ടൂറിസത്തിന്റെ ചിറകിൽ പറന്നുയരാൻ വൈപ്പിൻ ; കടൽപോലെ സാധ്യതകൾ,സർക്കാരൊന്നു മനസ്സുവച്ചാൽ മതി

ചെറായി ഉൾപ്പെടെയുള്ള ബീച്ചുകളിലെ കുറവുകൾ നികത്തണം. അടിസ്ഥാന സൗകര്യങ്ങൾ വികസിപ്പിക്കണം. സഞ്ചാരികൾ ഉഴുതുമറിക്കാത്ത ബീച്ചുകൾ വേറേയുമുണ്ടു വൈപ്പിനിൽ. അവയുടെ സാധ്യതകളും ഉപയോഗപ്പെടുത്തണം.വൈപ്പിൻ മണ്ഡലത്തിൽ തീരസംരക്ഷണത്തിനായി ആവിഷ്കരിച്ചിട്ടുള്ള പദ്ധതികൾ ബീച്ചുകൾക്ക് അനുഗ്രഹമാവുമെന്നാണു സൂചന. കടൽക്ഷോഭത്തെത്തുടർന്നുള്ള തീരനഷ്ടം ഒഴിവാക്കാൻ പുലിമുട്ട് അടക്കമുള്ള സംവിധാനങ്ങൾ ഒരുക്കേണ്ടതുണ്.അടിസ്ഥാന സൗകര്യങ്ങളൊരുക്കിയാൽ മറ്റു ബീച്ചുകളും ചെറായിയുടെ ചെറുപതിപ്പുകളായി മാറും.

പുതുവൈപ്പ് കേന്ദ്രീകരിച്ച് ഓഷ്യനേറിയം ഉൾപ്പെടുന്ന ഇന്ത്യ ഗ്രേറ്റ് അക്വാ പാർക്ക് എത്രയും വേഗം യാഥാർഥ്യമാക്കേണ്ടതുണ്ട്. വലിയൊരു വാതിലാണ് ഇതോടെ വൈപ്പിനിലേക്കു തുറക്കുക. ദശകങ്ങളായി പുതുവൈപ്പ് കടപ്പുറത്തേക്ക് സന്ദർശകരെ ആകർഷിച്ചു കൊണ്ടിരിക്കുന്ന ലൈറ്റ് ഹൗസിന്റെ സാധ്യതകളും അപാരമാണ്.